Hayungo chini hakotor o sawani thang khe wa no kar wi Tipra ni hukumu- mukumu wansok wi manya. Achai phuro ni simi thwi mani jora borok rok ni langma o waa samwng nango. Chini je phano panda-sobha, tei mwtai-atai suri thani wo wa samwng nango. Chwng Tiprasa rok da bai khe wa no naithok naithok khe decoration khaiwui panda mwchanrogw.
1. Mwtai-Atai rothanio wa:- wa wngkha Mwtai-Atai Rothani belai samungo thepajago. Ker Mwtai rothani ,wathor,khong kaiwi phatarni borok noksing mahapya tei noksingni borok bo phatar o manokharya. Kerni mwtai khumumung paiyasani kebo thang-phai wngwi Manya.
Tipra luku hukumu-mukumu o Garia Mwtai palai mung belai Kotor. O Garia Mwtai swnamthani wa belai kheno nang kukmani. Sathai kwlaio Mwtai swnawani wa kwthar nango. Mwtai ni bangchai tei chukchala bebak wabai mangno swnamjago.
Paithago sathai kwlaio Mwtai-Atai rothani wa belaino samwngo thepajago. Buphang rajano phuja rophoro, Twimao posa barok phoro, Mamita mwtai rophoro, Nakri mwtai rophoro wa samwngo thepajago.
2. Panda ni samwngo wa:- Kailai pandao wa bai chwnarowi snamjago kwthar- haya, chibwrwi mwtai nokhwlao wa bai swnamjago naithok khe. Tabok khe teibo naithok naithok khe wa no kwniwi chwnarojago. Borok thwi phoro bo wa baino tolai swnamjago hukumu-mukumu no rwgwi. Borok Thwi phoro je santai rok eba khe bwsala rok horsini sanini berao hao, o bera wa baino swnamjago. Chwrai achai phoro kwmajwk lumajwk rok wamwthak bai chwrai ni omthai rao. Chwrai hakari phoro wa ni swnamjak badukung bai kwmajwk lumajwk song badukung kokro o. Paithak o sawi mango achai phoro ni simi thwi phoro wa samwng nango.
3. Chamwng nwng mwngo wa:- Tipra luku Hoda o wasung gudok kaisa mwngwnang mwi. Waswngo mai mwi bo song wi chawai mano. Abano karwi bo juda- juda manwi khwnwi wa bai swnamjago , phunukmari---moso swjak nai bo khaiwi mano wa bai , mwiha swjak nai bo khaiwi mano wafisa , wa bai Ata bo khaiwi mano, wa ni kathi bo khaiwi mano,tei kwbangma tongo.
4. Manwi khwnwi swna Thani o wa:- Sawi manya jorani simi no wa ni manwi khwnwi Tipra luku hukumu o nukjak wi phaio. Borok ni langmao samwng manwi khwnwi, phunukmari- Kisi , Tising , Socheng, Langa, Swdan, Mai da mani Dol, Topon, Bailing, Chalami, Aa chajak mani Barai, Ridamani khwturu, tei kwbangma tongo . Abono kar wi bo mwswk ni kapai waruk bai naithok khe swnamjago. Tei bo tong o wa bai manwi haya khibi mani bo wa bai no swnamjago.
Paithak o sathai kwlaio borok rok ni langma o wa kwbangma jaderepor samwngo nango. Kok kisa bai Sana thang khe chwrai achai phoro omthai rajak nai wamwthak ni simi borok Thwi phoro tolai swnan mani jora wa samwng nango. Aboni bang wi borok rok kwthang tong nani bang wi wa belai nang kuk o . Wa no kiting wi wathor naithok khe swnamjago. Tabok ni jorao Tipra Kami amchai o wathor bai kwbang ma panda o sajok jak o.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.